"வன்னியர் என்பதே ஒரு தனிப் பேரினம்: அடையாளத்தை அழிப்பதை ஒருபோதும் சகிக்க மாட்டோம்!"
(கட்டாயம் படிக்க வேண்டிய விரிவான கட்டுரை!)
--------------------
"ஒரு கிராமத்தில் 'அக்னிகலசம்'
சேதப்படுத்தப்பட்டால் ஆயிரம் கிராமங்களில் அக்னி கலசம் சின்னம் பாட்டாளிகளால் அமைக்கப்படும்" என்று மருத்துவர் அய்யா அவர்கள் கூறியிருக்கிறார்கள்.
இந்த சூழலில் வன்னியர்களின் அடையாள சின்னம் 'அக்னி கலசம்' பின்னணியை அறிந்து கொள்வது அவசியமாகும்.
--------------------
"தோற்றத் தொன்மத்தின் தேவை"
--------------------
ஒவ்வொரு இனமும் தனக்கான வரலாற்றையும் தோன்றிய கதைகளையும் கொண்டிருக்கிறது. இந்த புராணக் கதைகள்தான் தேசங்களையும், இனக்குழுக்களையும் கட்டமைக்கின்றன. உண்மையில், உலகின் எல்லா தேசங்களும் கற்பனையும் வரலாறும் கலந்த கதைகளின் மீதே கட்டப்பட்டுள்ளன.
தோற்றத் தொன்மம் (Origin Myth) என்பது மிக முக்கியமான ஒன்றாகும். ஒரு இனத்தை ஒரே அணியாக நிறுத்துவதாகவும், அந்த இனம் ஒன்றுபட்டு செயல்படுவதற்கு வழிவகுப்பதாகவும் தொன்மங்கள் உள்ளன என்பது ஆய்வாளர்களின் முடிவாகும். "தொன்மம் போன்ற வெளிப்பாடுகள் ஓர் இனத்தின் கூட்டுமனம்; அந்த இனத்தின் அன்னியோன்யமான கூட்டுத் தன்முனைப்பு; தங்களைப் பற்றிய முழு அர்த்தப்பாடு ஆகும். ஆதலின் தொன்மம் என்பது அந்த இனத்தின் கூட்டுமனப் பிரதிநிதித்துவப் பதிவாகும்" - என்கிறது "வரலாற்று மானிடவியல்" எனும் நூல்.
வலிமையான இனக்குழுக்கள் அனைத்தும் தமது தோற்றம் குறித்த பூர்வீக வரலாற்று கதைகளை மீண்டும் மீண்டும் பேசுவதன் மூலமும், அதனை அடையாளப் படுத்துவதன் மூலமுமே நீடித்திருக்கின்றன. உலகின் பல நாடுகளும் இப்படித்தான் தம்மைக் காத்துக்கொண்டிருக்கின்றன.
--------------------
"வன்னியர் என்பதே ஒரு தனி பேரினம்"
--------------------
மனிதர்கள் ஒன்றுக்கும் மேற்பட்ட அடையாளங்களை கொண்டுள்ளனர். பேசும் மொழி, வாழும் நாடு ஆகிய அடிப்படைகளில் அடையாளம் காணப்படுவது போலவே, தமது பாரம்பரிய இனக்குழு வழியிலும் மனிதர்கள் தம்மை அடையாளப்படுத்திக் கொள்கின்றனர். அந்த வகையில், வன்னியர் சமுதாயம் என்பது ஒரு மிகப்பெரிய பேரினம் ஆகும்.
ஒரு தனி தேசிய இனத்துக்கான எல்லா தகுதிகளும் வன்னியர் என்கிற அடையாளத்துக்கு உள்ளது. அனைத்து வன்னியர்களையும் ஒரு புள்ளியில் இணைப்பது, வன்னியர்கள் நெருப்பில் இருந்து தோன்றியவர்கள் என்கிற 'அக்னிவம்ச' தொன்மக்கதை ஆகும். இதன் அடையாளமாக, நெருப்பில் இருந்து தோன்றும் வீரவன்னிய மகாராஜனையும் நெருப்பில் இருந்து தோன்றும் திரௌபதி அம்மனையும் வன்னியர்கள் தம்முடைய அடையாளமாகக் கொள்கின்றனர். கூடவே, நெருப்பின் அடையாளமான வன்னி மரமும் வன்னியர்களின் ஒரு முக்கிய அடையாளம் ஆகும்.
உண்மையில், உலகிலேயே மிகவும் வலிமை வாய்ந்த இனமாக கருதப்படும் 'யூதர்களை விட' மக்கள் தொகை அடிப்படையில் வன்னியர்கள் பெரிய இனம் ஆகும். உலகில் உள்ள ஒட்டுமொத்த யூத இன மக்களின் எண்ணிக்கை 1 கோடியே 30 லட்சம் பேர். உலகில் உள்ள ஒட்டுமொத்த வன்னியர்களின் எண்ணிக்கை இதை விட அதிகம் ஆகும்.
--------------------
"வன்னியர்களின் அக்னிவம்ச தொன்மம்"
--------------------
இந்தியாவின் மன்னர் பரம்பரையினர், போர் வீரர்கள் தம்மை சூரியவம்சம், சந்திரவம்சம், அக்னிவம்சம் என்று கூறிக்கொண்டனர். அந்த மரபின் படியே வன்னியர்கள் தம்மை அக்னி வம்சம் என்று அடையாளப்படுத்திக் கொண்டுள்ளனர். அந்த வகையில், வன்னியர்கள் அக்னியில் இருந்து தோன்றியவர்கள் என்பது நம்பிக்கை ஆகும்.
‘அக்னி வம்சம்’ என்கிற கருத்தாக்கம், அதாவது 'யாகத்தீயில் இருந்து அவதாரம் எடுக்கும் நிகழ்வு' புறநானுறு காலத்தில் இருந்தே தமிழர் வரலாற்றில் உள்ளது. ("நீயே, வடபான் முனிவன் தடவினுட் டோன்றி" - நீ வடபால் முனிவன் யாகக் குண்டத்தில் தோன்றியவன் - என்கிறது புறநானூறு பாடல் 201)
அருணாச்சல புராணம் திருவண்ணாமலையை ஆண்ட வல்லாள மகராஜனை, "மூவகையுள் வன்னி குலத்தினில் வரு மன்னா" என்கிறது. வில்லிபாரதம் சோழர்களை சூரிய வம்சம், பாண்டியர்களை சந்திரவம்சம், சேரர்களை அக்னி வம்சம் என்று குறிக்கிறது.
‘சோழர்களின் வீழ்ச்சிக்கு பின்பும் - விஜயநகர பேரரசின் படையெடுப்புக்கு முன்பும்’ தமிழ்நாட்டில் வன்னியர்கள் மற்றும் அக்னி வம்சம் குறித்த கருத்துக்கள் மேலோங்கியிருந்தது. அக்காலத்தில் வடதமிழ்நாடு 'வன்னியர் ராஜ்யம்' என்று பெயர்பெற்றிருந்தது. வன்னிய நாட்டை வெற்றி கொள்வதும், வன்னிய ராஜாக்களை வெல்வதும் விஜயநகரப் படையெடுப்பின் நோக்கம் என்று கங்காதேவியின் மதுராவிஜயம் எனும் சமஸ்கிருத காவியம் குறிப்பிடுகிறது. இலங்கையிலும் வன்னியர் ஆட்சி சிறப்பு பெற்றிருந்ததை இலங்கையின் வையா பாடல் குறிப்பிடுகிறது.
வன்னிய புராணத்திலும், வைத்தீஸ்வரன் கோவில் கல்வெட்டிலும், கம்பரின் சிலை எழுபது பாடலிலும், இலங்கையின் வையா பாடலிலும் 'வன்னியர்கள் அக்னியில் இருந்து தோன்றியவர்கள்' என்கிற செய்தி கூறப்பட்டுள்ளது. அக்னியில் தோன்றிய சத்திரியர்களான வன்னியர்கள் தீயில் தோன்றிய தெய்வமான திரௌபதியை வழிபடுகின்றனர். இது இந்தியாவில் வேறு எங்கும் இல்லாத பழக்கம் ஆகும்.
--------------------
“வன்னிய ராஜன் கதை”
--------------------
வன்னிய புராணம் என்பது தமிழக மன்னர்கள் நடத்திய மாபெரும் போர்களின் தொகுப்பு. பாதாமியிலிருந்து ஆட்சி செய்த சாளுக்கிய மன்னன் புலிகேசியை பல்லவ மாமன்னன் நரசிம்மவர்ம பல்லவன் வெற்றிக்கொண்ட கதை இதில் முதன்மையானது என வரலாற்று அறிஞர்கள் கருதுகின்றனர்.
மக்களுக்கு துன்பம் விளைவித்த வாதாபி சூரனை அழிப்பதற்காக, சிவ பெருமானின் நெற்றிக்கண்ணில் இருந்து தோன்றிய நெருப்புத் துளியை, சம்பு முனிவர் செய்த யாகத்தில் விழுச்செய்தார். அக்னி குண்டத்திலிருந்து வெள்ளைக் குதிரையில் கையில் வாளுடனும், தலையில் கிரீடத்துடனும் உதயமானவர் வீர வன்னிய மகாராஜா.
('ஓம குண்டத்தில் தோன்றிய போது தலையில் மகுடமும், கையில் வில்லும் கேடயமும் வேலும்... தோளில் அம்புகளும் அம்பறாத் தூணியும்... கட்டாரியும், வாளும், செங்கழுநீர் மாலையும் அணிந்து வீரவன்னிய ராஜன் தோன்றினான்' என்கிறது 'வீர வன்னியர் கதை - வன்னிய புராண வசனம்' எனும் நூல்)
சம்பு முனிவர் செய்த யாகத்திலிருந்து வீர வன்னிய மகாராஜா தோன்றிய நாள் பங்குனி உத்திரம். யாகம் நடந்த இடம் திருவானைக்கா, அங்குள்ள கோவில் சம்புகேஸ்வரம் எனப்படுகிறது. வன்னி குச்சியை எரித்து உருவான யாகத்தில் தோன்றியதால் வீர வன்னிய மகாராஜா என்று அழைக்கப்பட்டார். வன்னிய மகாராஜன் வழி வந்தவர்கள் வன்னியர்கள் என்பது வன்னிய புராணம் கூறும் செய்தி. இது வன்னிய நாடகம், வன்னிய கூத்து வடிவிலும் நடத்தப்படுகிறது. வன்னியராஜன் கோவில்களும் சில ஊர்களில் உள்ளன.
--------------------
"திரௌபதி வழிபாடு"
--------------------
இந்தியா முழுவதும் மகாபாரதக் கதை பேசப்பட்டாலும், இந்தியாவின் இதர பகுதிகளில் திரௌபதிக்கு கோவில்கள் கிடையாது. மகாபாரதக் கதையில் திரௌபதியின் கதை ஒரு பகுதி மட்டுமே. ஆனால், வன்னியர்களுக்கு திரௌபதி ஒரு அம்மனாக, முதன்மை தெய்வமாக இருக்கிறார். திரௌபதி நெருப்பிலிருந்து தோன்றியவர் என்கிற நம்பிக்கையே இதற்கு காரணம் ஆகும்.
பல்லவ மன்னன் மகேந்திரவர்ம பல்லவன் புலிகேசியால் தோற்கடிக்கப்பட்டு காஞ்சியிலிருந்து துரத்தப்பட்டான் (அல்லது கோட்டைக்குள் முடக்கப்பட்டான்). இதற்கு பழிவாங்க சபதமேற்ற அவனது மகன் நரசிம்மவர்ம்ம பல்லவன், மக்களுக்கு போர்க்குணம் ஏற்படச் செய்யவேண்டும் என்பதற்காக பாரதம் படிக்கும் பழக்கத்தை ஏற்படுத்தினான் என்கின்றனர் வரலாற்று ஆய்வாளர்கள்.
மக்கள் எல்லோரையும் போர்க்குணம் மிக்கவர்களாக மாற்றியதன் பலனாக, பெரும் படைத் திரட்டி புலிகேசி மீது போர்த்தொடுத்தான் நரசிம்மவர்மன். கி.பி.642 ஆம் ஆண்டில் பல்லவப் பெரும்படையால் புலிகேசியின் 'பாதாமி நகர்' தாக்கப்பட்டு அவன் தோற்கடிக்கப்பட்டான். பல்லவர்கள் மாபெரும் வெற்றிபெற்றார்கள். பல்லவர்களின் வெற்றிக் கல்வெட்டு, இப்போதும் பாதாமி கோவிலில் இருக்கிறது. (பாதாமி - கருநாடக மாநிலத்தில் உள்ள நகரம் - தமிழில் வாதாபி).
அதன் தொடர்ச்சியாக வட தமிழ்நாடெங்கிலும் திரௌபதி அம்மன் கோவில், பாரதம் படித்தல், தெருக்கூத்து, வன்னிய புராணம் என பல அடையாளங்கள் காணக்கிடக்கின்றன. திரௌபதி அம்மன் கோவில்களில் போத்துராஜா என்கிற பெயரில் இன்றும் பல்லவ மன்னர்கள் இருக்கிறார்கள் (மாமல்லபுரம் கல்வெட்டில் மகேந்திரவர்ம போத்துராஜா, நரசிம்மவர்ம போத்துராஜா என உள்ளது). மாமல்லபுரத்தில் திரௌபதி அம்மன் ரதம் சிற்பமாக உள்ளது.
(நரசிம்மவர்ம பல்லவன் வரலாறு - கல்கி எழுதிய 'சிவகாமியின் சபதம்' நாவலிலும், எம்ஜிஆர் நடித்த 'காஞ்சித் தலைவன்' திரைப்படத்திலும் கூறப்பட்டுள்ளது).
இன்றைக்கும் வட மாவட்டங்களில் பல நூறு ஊர்களில் திரௌபதி விழாக்கள் கோலாகலமாக நடக்கின்றன. பெங்களூர் நகரின் கலாச்சார அடையாளமான கரகா திருவிழாவில் - வீட்டுக்கு ஒரு வீரக்குமாரர் விரதம் இருந்து கையில் வாளோடு திரௌபதியை காப்பாற்ற இன்றைக்கும் வருகிறார்கள்.
--------------------
"வரலாற்று அடையாளத்தின் தேவை என்ன?"
--------------------
ஒவ்வொரு தேசமும், ஒவ்வொரு இனமும், ஒவ்வொரு இனக்குழுவும் தம்மை ஒருங்கிணைத்து, அடிமைத் தளைகளில் இருந்து விடுதலையாக வரலாறும், அந்த குழுவின் தொன்மமும் முதன்மையான கருவிகளாக உதவுகின்றன. காலம் தோரும் வரும் ஆபத்துகளுக்கு எதிராக தம்மை பாதுகாத்துக் கொள்ளவும் இந்த ஒற்றுமை அவசியம் ஆகும்.
மனிதர்களின் மிகப்பெரிய பலம் அவர்கள் கூட்டாக செயல்படுவதுதான். ஒரு சிலர் அல்லது சில நூறு பேர்தான் ஒருவருக்கு ஒருவர் நேரடியாக அறிமுகமாகி, கூட்டாக செயல்பட முடியும். அதே நேரத்தில், லட்சக்கணக்கான மக்கள் நேரடியான அறிமுகத்தின் மூலம் தம்மை ஒரே குழுவாக அடையாளம் காண்பது சாத்தியம் இல்லை.
லட்சக்கணக்கான மக்களை 'நீயும் நானும் ஒன்று. உன்னுடைய நலனும் என்னுடைய நலனும் ஒன்று. நாம் இணைந்து ஒரே இலக்கில் பாடுபடுவோம்' என்கிற கூட்டுமனத்தை உருவாக்குவது வரலாற்று உணர்வும், தம்மை பிணைக்கும் தொன்மக் கதைகளும், அவற்றுக்கான அடையாள சின்னங்களும் தான்.
அக்னி வம்சம், அக்னி கலசம், மஞ்சள் - சிவப்பு நிறம் என்பது பல லட்சம் வன்னியர்களை ஓரணியாக உணரச் செய்யும் மாபெரும் அடையாளம் ஆகும். இந்த அடையாளங்களை இழிவு செய்வோரை ஒருபோதும் சகித்துக்கொள்ள முடியாது.
-------------------------
குறிப்பு: தமிழ்நாட்டின் ஒவ்வொரு சமூகமும் தமது தொன்ம வரலாற்றுக் கதையை போற்ற வேண்டும். ஏனெனில், தமிழ்நாட்டை சீரழிக்கும் ஆபத்துகளான, ஏக இந்தியக் கொள்கை, மதவெறி தீவிரவாதம், தமிழர் அடையாள அழிப்பு, திராவிடத் திணிப்பு, கம்யூனிச சர்வதேசியம் ஆகிய கேடுகளில் இருந்து - பன்முக அடையாளங்களே தமிழகத்தை காப்பாற்றும். இதுவே ஜனநாயகத்தை நிலைநாட்டுவதாகவும் இருக்கும்.
- பாட்டாளி சமுக ஊடகப் பேரவை.
